Çfarë është një gabim refraktiv?
Gabim refraktiv do të thotë që forma e syrit tuaj nuk e përthyen dritën në mënyrë korrekte, duke rezultuar në një imazh të paqartë. Llojet kryesore të gabimeve refraktive janë miopia (dritëshkurtësia), hipermetropia (largpamësia), presbiopia (humbja e shikimit afër me moshën) dhe astigmatizmi.
Shkaqet e llojeve kryesore të gabimit refraktiv janë përshkruar më poshtë:
E njohur gjithashtu si dritëshkurtësia, miopia zakonisht trashëgohet dhe shpesh zbulohet në fëmijëri. Miopia shpesh përparon gjatë viteve të adoleshencës kur trupi po rritet me shpejtësi.
E njohur edhe si largpamësia, hipermetropia gjithashtu mund të trashëgohet. Fëmijët shpesh kanë hipermetropi, e cila mund të zvogëlohet në moshën madhore. Në hipermetropinë e lehtë, shikimi në distancë është i qartë, ndërsa shikimi afër është i paqartë. Në hipermetropinë më të avancuar, shikimi mund të turbullohet në të gjitha distancat.
Pas moshës 40 vjeç, lentja e syrit bëhet më e ngurtë dhe nuk përkulet aq lehtë. Si rezultat, syri humbet aftësinë e tij të përqendrimit dhe bëhet më vështirë për të lexuar nga afër. Ky proces normal i plakjes së lenteve mund të kombinohet edhe me miopi, hipermetropi ose astigmatizëm.
Astigmatizmi zakonisht shfaqet kur sipërfaqja e përparme e syrit, kornea, ka një lakim asimetrik. Normalisht kornea është e lëmuar dhe e lakuar në të gjitha drejtimet njësoj dhe drita që hyn në korne fokusohet në mënyrë të barabartë në të gjitha rrafshet, ose në të gjitha drejtimet. Në astigmatizëm, sipërfaqja e përparme e kornesë është më e lakuar në një drejtim sesa në një tjetër. Kjo anomali mund të rezultojë në shikim që është shumë i ngjashëm me shikimin në një pasqyrë të shtrembëruar, me valë. Zakonisht, astigmatizmi shkakton shikim të paqartë në të gjitha distancat.
Kirurgjia refraktive me lazer përfshin një grup procedurash oftalmologjike të avancuara, të dizajnuara për korrigjimin e gabimeve refraktive përmes riformësimit preciz të kornesë — pjesa e përparme transparente e syrit, përgjegjëse për fokusimin e dritës në retinë. Duke modifikuar kurbaturën dhe fuqinë optike të kornesë, këto procedura reduktojnë ose eliminojnë defektet refraktive si miopia, hipermetropia dhe astigmatizmi, me qëllim përmirësimin e mprehtësisë vizuale dhe zvogëlimin ose eliminimin e varësisë nga syzet apo lentet e kontaktit.
Teknikat moderne të korrigjimit të shikimit me lazer klasifikohen sipas shtresës së kornesë në të cilën kryhet ndërhyrja. Kategoritë kryesore përfshijnë procedurat stromale (në shtresën e mesme të kornesë), procedurat e ablacionit sipërfaqësor dhe teknikat minimale invazive intrastromale.
SMILE është një procedurë refraktive e gjeneratës së fundit për korrigjimin e miopisë dhe astigmatizmit, e realizuar ekskluzivisht me lazer femtosekond. Ndryshe nga teknikat tradicionale LASIK, në metodën SMILE nuk krijohet flap korneal; në vend të kësaj, formohet një lentikulë intrastromale brenda kornesë, e cila hiqet përmes një incizioni shumë të vogël (rreth 2–4 mm).
Kjo qasje minimalisht invazive ruan integritetin biomekanik të kornesë, redukton ndërprerjen e nervave kornealë dhe ul ndjeshëm incidencën e simptomave të syrit të thatë pas operacionit. Procedura zgjat vetëm disa minuta për secilin sy, është pa dhimbje dhe kryhet me anestezi topike (pika). Rikuperimi vizual është i shpejtë, ndërsa stabiliteti refraktiv arrihet brenda një periudhe të shkurtër pas ndërhyrjes.
SMILE rekomandohet veçanërisht për pacientët me miopi të moderuar deri të lartë, si dhe për individë me stil jete aktiv, për shkak të mungesës së flap-it dhe sigurisë së shtuar biomekanike.
Femto LASIK është një procedurë refraktive e avancuar që kombinon lazerin femtosekond për krijimin e flap-it korneal dhe lazerin excimer për riformësimin e saktë të kornesë. Përdorimi i lazerit femtosekond eliminon nevojën për mikrokeratom mekanik, duke rritur ndjeshëm precizionin, uniformitetin e flap-it dhe sigurinë e procedurës.
Teknika përdoret për korrigjimin e miopisë, hipermetropisë dhe astigmatizmit, duke ofruar rezultate të qëndrueshme dhe cilësi të lartë vizuale. Procedura është e shpejtë, kryhet me anestezi lokale me pika dhe pacienti zakonisht përjeton përmirësim të ndjeshëm të shikimit brenda 24 orëve.
Falë teknologjisë së avancuar, Femto LASIK siguron personalizim të trajtimit sipas parametrave individualë të kornesë, duke minimizuar komplikacionet dhe duke optimizuar rezultatet afatgjata.
LASIK është një nga procedurat refraktive më të përhapura dhe të konsoliduara për korrigjimin e miopisë, hipermetropisë dhe astigmatizmit. Kjo teknikë konsiston në krijimin e një flap-i të hollë korneal, tradicionalisht me mikrokeratom mekanik. Flap-i ngrihet me kujdes për të lejuar aplikimin e lazerit excimer, i cili riformëson me saktësi stromën korneale në thellësi. Pas përfundimit të aplikimit të lazerit, flap-i rivendoset në pozicionin e tij natyral pa nevojën e qepjeve.
Duke riformësuar kornénë, LASIK ndryshon fuqinë refraktive të saj, duke mundësuar fokusimin e saktë të dritës në retinë dhe përmirësimin e mprehtësisë vizuale. Procedura kryhet me anestezi topike (pika në sy), është praktikisht pa dhimbje dhe zgjat vetëm disa minuta për secilin sy.
Rikuperimi vizual zakonisht është i shpejtë, me shumicën e pacientëve që përjetojnë përmirësim të ndjeshëm të shikimit brenda 24–48 orëve. Rezultatet afatgjata janë të qëndrueshme dhe të parashikueshme kur përzgjedhja e pacientit dhe vlerësimi paraoperativ kryhen në mënyrë të detajuar.
Personat me vlera jashtëzakonisht të larta të dioptrisë (mbi -10,0 ose +6,00) ose korne (pjesa e përparme transparente e syrit) shumë të hollë ose të parregullt (e diagnostikuar gjatë ekzaminimit) dhe për shkak të saj korrigjimi i shikimit me lazer do t'i ekspozonte ata ndaj rrezikut të komplikimeve, një opsion është me anë të implantimit të lenteve fakike (Implantable Collamer Lens-ICL, ose iris claw-Artisan, Artiflex) në sy.
Lentet fakike implantohen në segmentin e përparmë të syrit (përpara ose pas irisit), pa hequr lenten natyrale dhe funksionojnë si lente kontakti në sy, por pacienti nuk i ndjen dhe nuk duhet të kujdeset për to.
- Korrigjimi Kirurgjikal i Presbiopisë
Lente multifokale intraokulare
Përparimet në teknologji kanë nxitur zhvillimin e lenteve intraokulare multifokale që kanë 2 ose 3 fokusime dhe i mundësojnë pacientit të ketë shikim të mirë në distanca të ndryshme pa syze.
Gjenerata e fundit e thjerrëzave multifokale janë thjerrëzat trifokale, të cilat sigurojnë një shikim të mirë në distancë të largët dhe të afërt, por gjithashtu sigurojnë një shikim të mirë në distancën e mesme, e cila është veçanërisht e rëndësishme për pacientët që punojnë në kompjuter. Në Universal Eye Hospital, prej shumë vitesh përdorim lente multifokale më të fundit të ofruara nga kompanitë lider të fushës.
